Te aba ae Amerika

Ngke i moan roko i Amerika ao I ataia ae te aba ae takabubura ma akea au atatai ae ngaia e tiraua mwakorokorona ke titeiti (States). I aki atai araia mwakorokorona (States) ni kabane ao i aki ataia ae ngaia a bane n toma. Ibukina bwa ia tiku naba i Hawaii ao n otau Hawaii mwakoron Amerika, i taku ngai bwa e toma ma nikiran Amerika ake nikiraia, I aki ataia ae iai taari imarenaia, ko aki kangai bwa e bon rang uarereke au atatai ni itera aikai n taai akekei. Engae n anne ao iai au karaki ni kangare ae uarereke. N reken au mwakuri ao teuana mai buakon bwaai ake i karaoi n au mwakuri bwa i buokiia aomata ake a kabooi aia tai ni motirawa nte Outero (Hotel) are I mwakuri iai. Temanna ara katitamwa e roko ao e anganai ana ID kaati are tamneina iaona ao ana atureti ke te tabo are e maeka iai. Iaon ana atureti ao e mwakoro bwa e maeka i PA. I titirakinna bwa ngaia kain Palau? Ao e taraai ma matana aika a mata n titiraki ao e taku, Palau? Antai Palau? Ia ataia ae e kairua au titiraki ngaia are ia manga titirakinna bwa tera PA? Ao ea tuangai are PA e tei ibukin kawan Amerika are Pennsylvania, aeua i bon ngareakinai. Ai bon te aboka ni bwainrang ngai ma are Ia bon tii karabwa naba ibukin ana kabwarabwara. Eang e bon tira mwakorokoron (States) Amerika ao bon akea au atatai ibukin araia aika a kakaokoro nagia are i taku bwa e kakawaki bwa tina taetae teutana iaon aei. Nna taetae teutana iaon buburan Amerika ma makorona nako ao mwaitin kaokoron te reeti ma ana boota n aomata ao tabeua riki atatai ake i taku bwa e kakawaki iroura ngaira ae tia tibwa roko ao ake a iangoa te mwaing.

Amerika bon teuana te aba are e wene imarenan Kanata ao Metiko. Teuana mai buakon aaba aika a takabubura ma kaawaana aika botan mwaitina Nimabwi (50). Abwi ma wanua (48) mai iai a bon bane ni wene ni meangin Amerika kontinente ao a toma ao uoua kawana ke atimwakorona aika a maenako bwa Alaska ao Hawaii. Ni makorona aika 48 aikai a bon koro anauia nte buti nte kaa. Bukina bwa a ban n toma ao bon akea tokin te buti iaona. Alaska e bon tannako nakon iteran Amerika are Maiaki ao Hawaii e booia nakon Tebetebeke.